Marzo 2017

son cinco caras
que comparten ollos
continentes irmanados

cambia a cor das caras
pero todos os ollos son negros
e todos os beizos brancos
as frontes e os narices violetas
e unha soa melena marchando

cinco mulleres que non se venden
e comparten ollar e camiñar

na rúa pi y margall vigo

adaptación das tres mulleres

de rini templeton a obreira

a labrega a estudante

o cedro do himalaya
e os álamos do país

as árbores perennes
sálvanse das brutais podas
pero as nosas caducifolias
tremen cada inverno
cando oen perto ou lonxe
a ameaza dunha motoserra

en balaído

fáltannos as asasinadas
querémonos vivas

faltan as asasinadas
e faltan as golpeadas
e as feridas que están
no hospital ou nas casas

e faltan as que teñen medo
e as non concienciadas
faltan as que están traballando
e as que están a coidar
as súas cativas ou ás súas nais

pero érades moitas e máis

que os últimos anos
e viñeron moitas rapazas
e ficastes máis tempo na praza
cortastes máis tempo o tránsito
ese tránsito que mal deseñan homes
e os armados de azulón
botánronos da nosa praza

e tamén nas faixas

nos debuxos nas consignas

e nos cantos fostes máis combativas

o cronista

bolboreta de auga
volve pousar nesta flor
bolboreta da charca
ven calmar a miña dor

bolboreta da presa
presa non tes no teu voo
bolboreta marela
pousa amiga no meu colo

a paloma suanzes
polas súas bolboretas de auga
no seu concerto no vitruvia
imaxe do meu barrio

manolo pipas

a homenaxe a ofrenda
a carta os poemas as historias…

as compas de contraMINAccion
encheron o comedor de cartaces
de activistas que deron a vida
pola terra e as súas comunidades

e foi a ofrenda dunha flor por cada
unha das dez persoas asasinadas
do consejo cívico de organizaciones
populares e indígenas de honduras
que encheron a cesta-asemblea
mentres isabel vilalba lía unha carta
de melissa cardoza para berta cáceres

e eu botei os últimos poemas
e outros do chapapote e de corcoesto
da serra madre do norte e do sur
do papalopam e istmo de oaxaca
da maría sabina da comandanta ramona

e os feminicidios alá e acá

de ciudad jaurez a chapela
e máis perseguidas e golpeados
compas rodrigo bettina bexe...
pablo alavés de alopam preso
juan e leonor e familia zapotecas
exiliad@ na cidade de lugo…

e mentres en baiona celebraban
a arribada que foi conquista xenocidio
nós a dúas voces recitamos a cova de eiros
e a berta cáceres das moitas augas

o planeta non é unha mina
defendamos como berta
terra mar aire chaira selva...
que nos dan toda a vida

pipas